Sa una katong nagskwela pa kog college sa USC, nag department Xmas party mi. Inato ra gud, gamay ra nga gathering. I think balay to sa isa ka classmate namo ang venue, unya nag chip in ra mi para palit og pagkaon. Naay food committee in charge sa pagpangompra ug pagluto sa pagkaon.
Pag oras na sa pagpangaon, gi-target na nako ang lumpiang shanghai. Pero gibadlong ko sa isa nako ka amigo, iya ko gihunghungan: "Mark, ayaw kuha anang lumpia."
Lami kaayo tan-awon ang lumpia, bag-ong haon. Init pa, unya crispy kaayo. Ganahan gyud kaayo ko mukuha sa lumpia. Akong gipangutana akong amigo. Apil pod diay sya sa food committee.
"Ang nangompra man gud ganina sa merkado kay si (anonymous). Dili diay kaayo sya swito mangompra, unya medyo na overestimate niya ang ginaling nga iyang napalit. Akong gisimhot ganina sa kusina, murag dili na man presko. Lain na gamay ang karne. Anugon pod kaayo kung ilabay, so akong gipasobraan ang asin. Gi asinan nako ug maayo."
Nagpasalamat ko sa iyang warning, so nikuha nalang kog pansit. Gi isnab nako ang lumpia. Kalimot napod ko kung ako ra ba ang iyang gi-warningan.
Gikalingawan nalang nako og tan-aw ang uban nga classmates namo nga nidiretso sa lumpia. Naay uban tag tulo diretso ang gikuha, tag upat, katong mga baga'g nawng tag lima diretso. Of course, kay gi timbrehan ko daan sa akong amigo, nag andam na ko unsay mahitabo. With anticipation.
Gisugdan na nila og paak ang lumpia.
Makita gyud nimo dayon ang change of expression sa isa ka tao nga excited kaayo mukaon, labi na katong gutom kaayo, unya nag expect sya nga ang lasa sa lumpia kay . . . lumpia.
"Tinabal!" kalit lang nga tyabaw sa akong maestro samtang nag usap sya sa iyang lumpia nga perteng parata. Wala na ko kahinumdom kung iya bang giluwa ang lumpia. "Shanghai ni or tinabal? Tinabal!"
Kung dili ko masayop, 18 ko ato. Karon 40 na ko. Pero wala gihapon ko kalimot ato nga Xmas party.
Anyway, lisud pangita og tarong nga lumpia wrapper diri sa mga supermarket sa Mexico, mao nang kung ganahan kog lumpia, muadto pa kog mga Chinese restaurant diri. Pero dili man sya Pinoy-style lumpia; egg rolls sya nga Chinese-American style. Pero mas okay gihapon sya kaysa lumpia nga tinabal flavored.
Kung lumpia imong sud-an ron, good for you. Please enjoy it for me nalang.
Ambot nganong nakahimumdom kog kalit atong parat kaayo nga lumpia.
